Ճապոնիայի ամենահարավային կղզում ՝ Կյուսյուում է գտնվում աշխարհի ամենազարմանահրաշ կիրճերից մեկը՝ Տակաչիհոն: Սա մի կախարդական վայր է, որտեղ Գոկասե գետը կտրում-անցնում է լեռնազանգվածի կենտրոնական մասը՝ ձևավորելով անհավանական նկարներ և բնատեսարաններ, որոնք արժանի են նկարիչների վրձնին: Տակաչիհո հովիտը իշխանությունների կողմից ճանաչվել է որպես բնական հուշարձան դեռևս 1934 թվականին: Եվ այն իսկապես արժանի է կոչվել ծագող արևի երկրի այցեքարտերից մեկը:
Կյուսյուն լեռնային անզուգական պեյզաժներով, բնության հետաքրքիր երևույթներով, հարուստ պատմությամբ, վառ քաղաքներով և գրավիչ գյուղերով մի վայր է: Եվ, իհարկե, այստեղ շատ հանգիստ մթնոլորտ է տիրում:
Տակաչիհո կիրճը գտնվում է կղզու կենտրոնական մասում: Հայտնի վայր է ամբողջ աշխարհի զբոսաշրջիկների շրջանում, բայց և ճապոնացիները այստեղ քիչ չեն, կհանդիպեք նաև թայվանցիների:
Տակաչիհո ձորը առաջացել է կարծրացած լավայից հրաբխի ժայթքման արդյունքում: Այն երջանիկները, ովքեր կուղևորվեն այնտեղ զբոսանքի սպասում են անմոռանալի տպավորություններ՝ լինի դա ոտքով, թե նավով զբոսանք: Նավակները այստեղ տրվում են վարձակալությամբ, իսկ թրեքինգի սիրահարների համար կիրճում վեց հարյուր մետրանոց հետիոտնային երթուղի է անցկացվել: Ամբողջ երկայնքով այն զարդարված է գարնանից մինչև ամառվա սկիզբ ծաղկող լեռնային բալենիներով, լեռնավարդերով և գլիցինիաներով, իսկ աշնանը դեղին-կարմիր ծառերով:
Այստեղ զբոսանքի համար նավակները ձեռքից ձեռք են խլում: Հետևաբար, եթե որոշել եք նավակով զբոսանք կատարել, ստիպված կլինեք նախապես հոգ տանել դրա մասին և շուտ գալ, մինչդեռ բոլոր նավակները չեն վերցրել: Եթե մեքենայով եք պատրաստվում հասնել Տակաչիհո կիրճ, ապա այն կարող եք թողնել վճարովի կայանատեղիում:
Ոչ մեկին անտարբեր չեն թողնի բարձր բազալտային ժայռերը, որոնք ասես սյուներ վեր են խոյանում կիրճի կողմերում, կամուրջները, որոնք ձգվում են գետի վրայով, փայլուն շիթերով թափվող տասնյոթ մետրանոց ջրվեժը:
Ջրվեժը թափվում է անմիջապես ժայռից, ինչը ինքնին անսովոր է: Ամենայն հավանականությամբ, ջրվեժը ձևավորվում է ինչ-որ ներքին աղբյուրներից կամ գետնաջրերից:
Տակաչիհո կիրճը գտնվում է համանուն քաղաքից ոչ հեռու: Եթե ոտքով այնտեղ գնաք, ապա ամբողջ ճանապարհը կտևի մոտ 30-40 րոպե: Գործում է նաև քաղաքային ավտոկայան, որտեղից մեկնում են տուրիստական ավտոբուսները: Բայց նրանք աշխատում են տոներին և հանգստյան օրերին, իսկ սովորական օրերին նրանք չեն գործում: Հանգստյան օրերին կիրճ այցելելը չի սահմանափակվում, բայց այն կարող է փակվել սաստիկ վատ եղանակի դեպքում, երբ ջրի մակարդակը խիստ բարձրանում է:
Հնարավորություն կունենաք նաև այցելել քաղցրահամ ջրի ակվարիում, որը գտնվում է Տակաչիհոյի հարավային մասում, փոքրիկ արհեստական լճակ, որը լցված է ձկներով, մի քանի ռեստորաններ և հուշանվերների խանութներ:
